Yaum e Wiladat e Imam Hasan AlaihisSalam 15 Ramzan (2025)

15 Ramzan Youm-e-Wiladat (Birthday) Shabeeh-e-Mustafa, Rehan-e-Mustafa (Huzoor ke Phool), Noor-e-Nazar-e-Zahra o Murtaza, Sayyada Shabab-e-Ahlil Jannah, Panchwe Khalifa-e-Raashid, Amir al Momineen Abu Muhammad Hazrat Sayyeduna Imam Hasan al-Mujtaba RadiAllahu Anhu Alaihiswalatu was-Salam!!*

Aapki Wiladat ke baad Aapke Mubarak Kaano me Sarkar-e-Do Aalam SallAllahu Alaihi wa Aalihi wa Sallam ne Azaan di, Aapka Naam bhi Huzoor ne rakha, Aapka Aqeeqa bhi Huzoor ne kiya.
RasoolAllah SallAllahu Alaihi wa Aalihi wa Sallam Aap Alaihissalam aur Aapke Bhai Sayyeduna Imam Hussain Alaihissalam se itni Muhabbat thi Aaqa SallAllahu Alaihi wa Aalihi wa Sallam ne kabhi bhi ek baar bhi Hasanain Kareemain ko “Nawase” kehkar nahi pukara, Jab bhi Hasanain Kareemain ko mention farmaya to “MERE BETE” kaha!!
Aur Muhabbat ka aalam ye bhi tha Haalat-e-Namaz me bhi agar Shahzadgan Aaqa ki Pusht Mubarak pe chad jaayen to Aaqa Apna Sajda taweel karelete ke kahi Sar-e-Aqdas uthane se Hasanain Kareemain ko taklif na ho.
Apne in 2 Pyare Beto ko hamesha kareeb rakhte aur hamesha unhe sughte aur farmate Ye Dono he to Mere Gulshan-e-Duniya ke Phool hain.
Kahi jana ho to Dono Shahzadon ko Apne Mubarak Kandho pe sawaar kar lejaate, raste me kisine Shahzado se kaha “Bacho kitni Achi Sawaari hai” to iske jawab me Aaqa farmate “Sawari ki taarif karnewaale, ye bhi dekho Sawaar kitne ache hain!!!”

Aaqa SallAllahu Alaihi wa Aalihi wa Sallam ne Apne in Dono Phoolon ke baare me Hukman farmaya ” Jo Mujhse Muhabbat karta hai us par In Dono se Muhabbat karna Waajib hai.”

Aswalatu was Salamu Alaika Ya Hasanain Kareemain, Aapki Azmat pe saari Kainat Qurban jaaye!!

Imam Hasan Alaihissalam ki Wiladat-e-Ba’Saadat sabko bahot bahot mubarak ho!

SallAllahu Alaihi wa Aalihi wa Ashabihi wa Baarak wa Sallam

72 Lines Amir ul Momineen Sayyeduna Imam Hasan Alaihissalam❤️👑 ki Shaan me:
💐💐💐💐💐💐💐💐💐💐💐💐

HASAN wo Jiska Naam Khud Allah rakhe
HASAN wo Jiska Chehra, Chehra-e-Rasool lage
HASAN wo Jiske Abba Kulle Imaan bane
HASAN wo Jiski Ammi Kainat ki Sayyeda bane
HASAN wo Jiska Bhai Sayyedus Shuhada bane
HASAN wo Jiski Behan Lehja-e-Qudrat bane
HASAN wo Jiska Gharana Ahle Bayt bane

HASAN wo Jo RasoolAllah ka Chain hai
HASAN wo Jo RasoolAllah ka Noor-e-Ayn hai
HASAN wo Jo Raakib-e-Dosh-e-Paigambar hai
HASAN wo Jo RasoolAllah ka Phool hai
HASAN wo Jo Hum Shabeeh-e-Rasool hai
HASAN wo Sibt-e-Khatmur Risalat hai
HASAN wo Jo Khatamul Khilafat-e-Raashid hai
HASAN wo Jo Wilayat ka Imam hai
HASAN wo Jo Jannat ka Sardar hai

HASAN wo Jiski Muhabbat Allah ne Farz ki
HASAN wo Jiski Mawaddat Quran ne Farz ki
HASAN wo Jiski Ita’at RasoolAllah ne Farz ki

HASAN wo Jiski Sana Quran kare
HASAN wo Jiski Hamd Alhamd kare
HASAN wo Jisse Muhabbat Paygambar karen

HASAN wo Jiska Jhoola Jibrael jhulaye
HASAN wo Jiska Naam Auliya japaye
HASAN wo Jiski Shaan Quran bataye
HASAN wo Jiska Muqaam Hadees me Aaye
HASAN wo Jisko ummat Apna Khalifa banaye

HASAN wo Jisko Rasool Kandhon par bithaye
HASAN wo Jiske liye Rasool Khutba rok kare niche aaye
HASAN wo Jiske liye Sajda-e-Rasool lamba hojaye
HASAN wo Jo Chadar e Muzammil me dakhil hojaye
HASAN wo Jo Kamli-e-Mudassir ke andar aajaye
HASAN wo Jiske liye Surah Dahar Nazil ki jaaye
HASAN wo Jiski Taharat Quran bataye
HASAN wo Jiski Shaan Farishte sunaye
HASAN wo Jiske Naaz ALI Uthaye

HASAN wo Jisko Kaabe jaanta hai
HASAN wo Jisko Hajr e Aswad pehchanta hai
HASAN wo Jisko Makka Salam karta hai
HASAN wo Jisko Madina Pyar karta hai
HASAN wo Jisse duniya ka nizaam hai
HASAN wo Jisse gardish-e-ayyam hai
HASAN wo Jiska sadqa Suraj leta hai
HASAN wo Jiske Noor se Qamar roshan hota hai
HASAN wo Jiski Rif’at ko Aasman Salaam karta hai

HASAN wo Jiska Muqaam Aasman se zyada buland hai
HASAN wo Jiski Seerat Suraj se zyada roshan hai
HASAN wo Jiski Surat Chand se zyada khoobsurat hai

HASAN wo jo Sadqe me saltanat bhi dedeta hai
HASAN wo jo Deen pe sab kuch Kurbaan kardeta hai
HASAN wo Jiske Darr se koi mayus nahi jata
HASAN wo Jiski Bargah se koi khali haath nahi jata

HASAN wo Jis jaisa Sakhi koi nahi
HASAN wo Jis jaisa Wali koi nahi
HASAN wo Jis jaisa Gaazi koi nahi
HASAN wo Jis jaisa Imam koi nahi
HASAN wo Jis jaisa Aabid koi nahi
HASAN wo Jis jaisa Aalim koi nahi
HASAN wo Jis jaisa Tahir koi nahi
HASAN wo Jis jaisa Kamil koi nahi
HASAN wo Jis jaisa Aadil koi nahi
HASAN wo Jis jaisa Murshid koi nahi
HASAN wo Jis jaisa Rehbar koi nahi
HASAN wo Jis jaisa koi nahi

HASAN wo Jispe Khuda ko Naaz hai
HASAN wo Jispe Mustafa ko Naaz hai
HASAN wo Jispe Murtaza ko Naaz hai
HASAN wo Jispe Sayyeda ko Naaz hai
HASAN wo Jispe Ambiya ko Naaz hai
HASAN wo Jispe Malaika ko Naaz jai
HASAN wo Jispe Momino ko Naaz hai.
HASAN wo Jispe khud Naaz ko Naaz hai!

Alaihim Afdalus Salawatu was-Salaam

Allahumma Salle Ala Sayyedina Imam al-Hasan wa Ala Jaddihi wa Jaddatihi wa Ummihi wa Abeehi wa Akhihee wa Ukhtihee wa Ahle Baytihi wa Baarik wa Sallim.